元朗有學童疑趕返學衝燈捱車撞!有網民在社交平台上載「車Cam」片段,顯示事發於昨晨(4日)8時許,當時一輛旅遊巴由宏達路右轉入屏會街,沿快線往元朗安寧路方向行駛,當駛至近一燈位後,因前方交通受阻,故停在行人過路處前等候。適時,一名男童疑趕返學,未有留意行人燈號為紅燈,由旅遊巴車頭右至左橫過馬路。 其時一輛客貨車沿慢線駛至,司機疑因旅遊巴阻擋視線,未留意到學童由車罅步出,將其撞倒地上,幸當時車速不算太快,未有造成嚴重意外。學童捱撞後自行起身,一拐一拐步向行人安全島,一名男途人目睹上前查問學童情況,影片亦因拍片的車輛駛走完結。執法部門暫未收到相關的人士報案。 有網民睇片後指摘客貨車司機「有經驗既司機,見大巴停左,就算綠燈,都會小心慢駛」,另有人撐司機「已經揸好慢咁過,否則個小朋友變咗炮彈」、「司機算停得快,學生哥好彩」,而對學生哥衝燈過路,有網民指「依啲真係累死司機,好彩車速唔快」、「真係慘,畀車撞都要即刻起身趕住返學」、「希望小朋友經過今次會醒d,唔係次次咁好彩。」 原文網址:車cam直擊 : 元朗男學童攝車罅衝紅燈過馬路 被客貨車撞低 | on.cc東網 | 港澳 https://hk.on.cc/hk/bkn/cnt/news/20240305/bkn-20240305001411722-0305_00822_001.html